Subject: Mallonga raporto pri Ivo

Christoph Knabe			                TFH Berlin, FB VI
http://www.tfh-berlin.de/~knabe     ( Technische Fachhochschule )
                                    ( universitato de aplikataj sciencoj )
                                    ( university of applied sciences )
                                    Luxemburger Str. 10
                                    DE-13353 Berlin, 1999-07-12
Karaj listanoj,

mallonge mi raportu pri la evoluo de Ivo, kvankam li nun ne havas
naskigxtagon, sed agxas 4 jarojn + 8 monatojn.

Mi alparolas lin Ee, Gordana kroate, ni gepatroj inter ni parolas
germane. Ivo de preskaux 2 jaroj jam vizitas germanlingvan infanejon.

De sia 2a jaro li parolis aktive kroate al la patrino, esperante al mi kaj
germane al aliaj infanoj. Nur dum REF li rimarkis, ke ekzistas specialaj
infanoj, al kiuj oni devas paroli esperante.

Nun post 2 jaroj de infanejvizito li ankoraux fidelas al tiu lingvuzo,
nur li pli kaj pli enportas germanajn vortojn en siajn alilingvajn
frazojn. Ekz-e li diras: "Pacxjo, acxetu al mi Eis" (t.e. glaciajxon).
Tiam mi kutime redemandas: "Cxu mi acxetu al vi glaciajxon?" kaj Ivo
jesas: "Jes, glaciajxon". Same ankaux okazas en la kroata.

Tio simple devenas de la multo da tempo, kiun li nun pasas en
germanlingvio. Li vizitas la infanejon de la 9a gxis la 16a horo kaj poste
ofte ankoraux volas viziti najbarajn amikojn (konpreneble kun ili li
parolas germane). Sed dum la semajnfino rimarkeble pli aktivigxas liaj
negermanaj vortoj. 

Belas lia spontana produktiveco en Esperanto.
Ekz-e li diris: "Pacxjo, rigardu, mi enmetas la dikfingron en la
manon kaj batos". Mi: "Jes, vi faras pugnon. Tion oni nomas pugno.
Per tio vi povas forte bati."
Ivo: "Pacxjo, pugnu min!" kaj ridis pri la atendata "atako".
Tiu "pugnu min" estis nova por mi, mi neniam uzis gxin antauxe,
sed kompreneble, tio estas Esperanto produktiva.

Tiom suficxu nun,
momente mi estas tre sxargxita de la semestrofinaj ekzamenoj,
de la fiasko de mia hejma komputilo,
kaj de la preparado al la REF/FF, kie cetere estas ankoraux
liberaj lokoj.

Cxion bonan,

Christoph